بشرى للصحافيين المغاربة: 3 ملايير سنتيم جاية من حقوق المؤلف

بشرى للصحافيين المغاربة: 3 ملايير سنتيم جاية من حقوق المؤلف

أخيرا جات الفرحة ديال بصح للصحافيين والصحافيات اللي كانو كيجريو ورا الخبر وورا الراتب اللي ما كيغطيش حتى القهوة ديال الصباح. الوزير محمد المهدي بنسعيد، وزير الشباب والثقافة والتواصل، أعلن فندوة صحفية يوم الخميس 19 فبراير 2026، على الخبر : الحكومة غادي ترصد 3 ملايير سنتيم (30 مليون درهم) باش الصحافيين يستافدو من عائدات حقوق المؤلف على مقالاتهم الإبداعية.هاد الخبر جاء فإطار شراكة جديدة مع المكتب المغربي لحقوق المؤلف والحقوق المجاورة (BMDA)، واللي غادي يفتح بوابة إلكترونية خاصة باش الصحافيين يسجلو فيها ويصرحو بمقالاتهم اللي تنسخو (فالفوتوكوبيوز، التليفونات، و جميع الشاشات…). ومن بعد، الفلوس اللي تجمع غادي تتوزع عليهم مباشرة، مع 30% غادي يروحو للمؤسسات الصحفية اللي كيخدمو فيها.

كيفاش كيخدم المكتب المغربي لحقوق المؤلف (BMDA)؟

باختصار، BMDA هو المؤسسة الرسمية اللي كتدير حقوق المؤلفين فالمغرب منذ سنين. كيجمع الرسوم من الجمارك والمؤسسات اللي كيستعملو الأعمال المحمية (موسيقى، كتب، مقالات، أفلام…) بدون إذن، خاصة فحالة “النسخ الخاص” (photocopie ديال المقالات فالجامعات والمدارس مثلا).

الآلية بسيطة:المكتب كيحدد التعرفة على النسخ والاستعمال.

كيجمع الفلوس من المستعملين (مثلا مراكز النسخ، المؤسسات التعليمية…).

كيوزع العائدات على أصحاب الحقوق اللي مسجلين عندو (المؤلفين، الفنانين، والآن الصحافيين).

الصحافيين الجدد فهاد المنظومة، واللي كانو خارجها قبل، غادي يدخلو رسميا ويستافدو من نسخ copie مقالاتهم.

هاد الشي غادي يكون محفز كبير للإبداع الصحفي، خاصة فزمن الإشهار اللي خايب و كيدعم المشاهدات كيفما كان نوعها والدعم اللي ما كيجيش ديما.

وكيفاش الصحفي المهني غادي “يسخر من نفسه” بعد ما ياخد حقه؟، تخيل معايا الصحفي اللي كان كيبقى يقول “أنا كنت كنكتب مقالات تاريخية و فكرية وما عندي حتى باش نشري طاكوس”، دابا غادي تجيه الفلوس من النسخ ديال مقالاتو، ويبدا يسخر من راسو قدام الزملاء:”واخيرا غادي نشري القهوة بدون ما نطلب كريدي من الكافيتي!”
“كنت كنقول المقالة ديالي غادي تقراوها جوج ناس، دابا كلشي عندو تيليفون سمارت فون وأنا غادي نستافد!”
“أنا اللي كنت كنبكي على الراتب، دابا غادي نبدا نضحك على اللي كانو كيقولو ‘الصحافة مهنة الفراقشية’!”

باختصار، هاد الخطوة تاريخية وغادي تعطي نفس جديد للصحافة المغربية. الصحافيين، سجلو فالبوابة الإلكترونية ديال BMDA بسرعة، وصرحو بمقالاتكم الإبداعية. راه جات الفرصة باش تستافدو من شغلكم كما يجب!راه هاد الشي بداية خير، وإن شاء الله يتبعوه خطوات أخرى باش الصحافة تبقى حية وقوية فالمغرب.