فستان لورين سانشيز بـ100 ألف دولار؟ وشباب يقولوا: الزواج غير بالكريدي!
ياك أش خباركم، يا الشباب! سمعتوا بالفستان ديال لورين سانشيز، خطيبة جيف بيزوس، اللي لبساتو فالحفلة ما قبل الزواج؟ 100 ألف دولار، يعني بحسابنا غادي تبقى تحسب حتى توصل تقريباً مليون درهم! مليار آه!إيوا، مليون درهم، يعني كتشري بيه دار صغيرة فالصخيرات ولا تفتح محل ديال الكفتة وتزيد تشد شي قرقاشة مستعملة! ولكن قبل ما تبداو تقولوا “الزواج مشروع فاشل” وتهربوا للقهوة تتفرجوا فالماتش، و لا تبدو فتيراس، اسمعوا ليا شوية، غنضحكو ونشوفو كيفاش نقدرو نخرجو من هاد العزوف على الزواج فالمغرب.
الفستان ديال لورين، والله إلا تحفة فنية، مشد ذهبي لامع وتنورة مطرزة على الجدع بحال شي لوحة ديال متحف. ولكن، بصراحة، كون عندك فلوس بحال بيزوس، غتلعب بالفستان بحال اللي كيلعب بالبلاي ستيشن! أما احنا، يا لمغاربة، فين ما كاين فلوس بحال هادوك! العروسة عندنا كتقول ليك “جيبلي فستان بحال ديال لورين”، ونتا كترد: “والله حتى نجيبلك طاكوس وكاس ديال أتاي، وخلّي الفستان يمشي يلعب!”.
المشكلة فالمغرب، يا خوتي، هي الغلا. الزواج بقا بحال شي مغامرة ففيلم “إنديانا جونز”. القاعة غالية، و تريتور و النگافة تقولك اللبسة غالية، و المغني يضرب ليك الطر من تحت الدف ،العدول غالي، حتى الزفة ديال السيارة كتبغي 500 درهم فالساعة! و الفييول على حسابك، ومع هاد الغلا، الشباب بداو يخافو من الزواج بحال اللي خايف من الكورونا ف2020. ولكن، يا التݣادة، الزواج مش لازم يكون بحال فرح بيزوس فالبندقية Vinizia بـ46 مليون دولار! عندنا حلول ديال “البْريكولاج” المغربي.
بغيتي فستان؟ روح للسوق ديال درب غلف، كاين فساتين زوينين بألف درهم، وإلا كنتي فنان، خيّط واحد عند الخياطة ديال الحومة، وتوفر الباقي للدجاج ديال العرس. بغيتي حفلة؟ شد تيليفونك، حط شي ليست ديال أغاني ديال ناس الغيوان ولا جيلالة، وخلي الجيران يجيبو الكوكا والفانتا. الحب، يا إخوان، مش فالفلوس، الحب فاللي كيشاركك الأفراح والمشاكل… وحتى فاتورة ديال الضو.
ولو خفتي من الغلا، عندك الكريدي! البنوك كيقدمو قروض للزواج، وإلا ممكن تجمعو شي كمشة من الفلوس من الرباعة ديالكم (ولكن قوليلهم غير باش تشدي الكوزينة، راه ما غيصدقوش الفستان ديال مليون درهم). وإلا حسيتي الزواج ثقيل، فكّر فهادشي: حتى فالبندقية Vinizia، الناس زعفو من بيزوس ولورين حقاش “حكمو المدينة” بفلوسهم. يعني، حتى لو عندك الملايين، كاين اللي غيزعّف منك!
فيا الشباب، بلاش تخافو! الزواج مش لازم يكون بحال شي مشروع ديال لانازا. قلبوا على بنت الحلال اللي كتعرف القيمة ديال درهم، وممكن تفرحكم بكاس أتاي وطبسيل ديال كعب الغزال و مصابان. وإلا حسيتوا الضغط، بْداو بشوية: دعيوها على عصير فالقهوة، ولا جيبو شي زلافة ديال الحريرة من عند الوالدة. المهم، خلّيو الحب يغلب الغلا!
غا باش تشجعو على الزواج فالمغرب: ركزو على الفرحة، مش على الفلوس. فرح صغير مع العايلة والرباعة أحسن من ديكور بمليون درهم. دورو على شريكة تفهمكم، مش اللي كتطلب فستان بحال ديال متحف.
إلا خفتو من تكاليف الزواج، بْديو بشوية: خطوبة صغيرة، ولا عشية زوينة فالدار مع الحنان والدفا. الحب زوين، والغلا نتحدّاو عليه!
Comments ( 0 )