مطيشة VIP بـ14 درهم.. و شلاضة هادي
ما بقاش حتى الوقت للضحك. وصلنا لمرحلة المطيشة الواحدة (الوصلة ديالها) كتسوى 14 درهم في الأسواق المغربية.
14 درهم! يعني واحدة صغيرة حمراء، ناعمة، طرية، كتجيبو معاها ريحة الذهب والفضة مع بعض. كنتي غادي تشتري كيلو غادي يجيب ليك فاتورة كتساوي قيمة اشتراك نتفليكس لشهر كامل.
تخيلو معايا المشهد: واحد المرأة داخلة للسوق بـ100 درهم فجيبها، غادي تخرج بثلاث حبات مطيشة، بصلة واحدة، وشوية نعناع… ويبقى معاه 20 درهم تقول لراجلها: «ياكما غادي نعملو شلاضة راه خصها غير تنوض تجيب لموناضا؟». الراجل كيرد عليها: «كون جبتي معاك التراب، هادي غادي نزرعوها في البلكون ونتسناو الشتا ».
السؤال اللي كيطرحو الناس كاملين: شنو وقع؟ الشتا جابت لنا المطيشة من المريخ؟ ولا الدولة قررت تحول المطيشة لمنتوج فاخر بحال الافوكادو؟ المهم، المزارعين كيقولو ليك «الجفاف والحرارة»، والتجار كيقولو ليك «النقل و المازوط غاليين»، والحكومة كتطلع بيان رسمي: «الأسعار تحت السيطرة… راه المواطن خاصو يتعلم يأكل بدون شلاضة». حتى الفقير اللي كان كياكل المطيشة مع الخبز والزيتون صباح مساء، حاليا كيبقى كيحلم بها.
المطيشة صارت رفاهية. كتسوى أكثر من لترو تاع المازوط. أكثر من كيلو ديال الخبز. أكثر من قهوة في رأس الدرب. يعني واحد كيشري مطيشة كيحس براسو لاباس عليه و معتدل ليه الضغط الدموي… لمدة 3 دقايق قبل ما ياكلها ويرجع يفكر في المازوط امتى يطيح و تسالي و يحلو ليه المضيق.الحاصول ا إخوان: إذا بقينا كندفعو 14 درهم فالمطيشة، غادي نرجعو لأيام نحطو فيها عود ند و نتبخروا بها . والشلاضة؟ غادي تصير طبق VIP في المطاعم الفخمة، وكل واحد كيبغي يأكلها خاصو يحجز قبل شهر. الله يعطينا الصبر… أو يعطينا مطيشة رخيصة على قد الجيب. والسلام.
Comments ( 0 )